angin rintih tengah poe
ngipukeun binih endah
jeroen dada: cinta terlarang!
aduh, na timana jolna
meureun sepi, boa honcewang
pedah nunggeulis diudag umur
waktu sigana jadi lantaran
meungkeut urang beuki deukeut
amprok saban poe:
stadion, lapangan badminton, kolam renang
meureun di dinya rasa teh tumuwuh
atawa dina liuh tatangkalan
tempat urang silih poyok, silih eledan
rasa disidem: teu wani balaka
pan anjeun geus aya nu boga
cinta siga kieu geus kabade tungtungna
tapi kasadaran teh musna
basa suku nincak tanah sebrang
angin nu nyebarkeun ambeu walungan purba
mere kawani: blakblakan lewat tulisan
jajaten neumbrag tembok
hate anjeun geus taya lolongkrang
"mending babarayaan
siga nu datang samemehna."(*)
Tidak ada komentar:
Posting Komentar